Градот Скопје продолжува со засилени активности насочени кон обнова на јавните површини и подобрување на урбаниот амбиент, со посебен фокус на враќање на достоинствениот изглед на централното градско подрачје. Како што соопштија денеска од Град Скопје, акцентот е ставен на местата кои со години беа занемарени и оставени без основно одржување.
Со засилен ангажман и координација на сите градски служби, започнати се интервенции чија цел е да се врати функционалноста, безбедноста и убавината на просторот кој го користат илјадници граѓани и посетители.
Градоначалникот Орце Ѓорѓиевски истакна дека се враќа сјајот на Скопје:
„Деновиве интензивно се работи на сите страни низ градот. Го средуваме она што со години беше запоставено, а требаше да се одржува секојдневно, затоа што Скопје го заслужува најдоброто.“
Конкретни интервенции на Плоштадот „Македонија“:
- Замена на скршените и пропаднати плочки.
- Враќање во функција на фонтаните кои долго време беа неактивни.
- Решавање на проблемот со пристапните патеки, кои досега беа предизвик за граѓаните.
„Скопје мора да биде достоинствен, уреден и убав град, токму таков како што го паметиме и каков што сакаме да го оставиме за идните генерации“, нагласи Ѓорѓиевски.
Тој додаде дека работата се спроведува за граѓаните, но и за сите гости кои секојдневно доаѓаат да го запознаат главниот град.