Дирекцијата за заштита и спасување (ДЗС) успешно спроведе акција за отстранување на неексплодирана артилериска граната од 155 милиметри, тешка околу 45 килограми, која датира од Првата светска војна.
Гранатата била пронајдена во атарот на селото Пепелиште, општина Неготино, а поради местоположбата и непристапниот терен, нејзиното отстранување се одвивало во сложени услови.
ДЗС
„Поради непристапниот терен и локација на неексплодираното убојно средство во коритото на реката Вардар, интервенцијата беше реализирана во сложени услови. Со логистичка поддршка од Територијалната противпожарна единица – Неготино, којашто обезбеди чамец за пристап до локацијата, а пиротехничарот на ДЗС, Ѓорѓи Стефанов, безбедно ја извлече гранатата, по што таа беше транспортирана и обезбедена до нејзиното конечно уништување на армискиот полигон „Криволак“ – информираа од ДЗС.
Од ДЗС упатија благодарност до ТППЕ – Неготино за професионалната соработка и навремената поддршка.
Дирекцијата апелира до граѓаните доколку пронајдат сомнителни експлозивни средства да не ги допираат или преместуваат, туку веднаш да го пријават случајот на 112, единствениот бесплатен број за итни случаи.