Уште еден осуденик за настаните од 27 април 2017 година доби условен отпуст, откако одлежа две третини од изречената затворска казна за упадот во Собранието. Станува збор за Вилијам Михајловски – Вили, кој преку објава на социјалните мрежи информираше дека од 1 јануари е на условна слобода.
Михајловски најави дека планира постепено да се врати на јавниот и професионалниот живот, притоа нагласувајќи дека политиката ја остава зад себе.
Во пораката до јавноста, тој соопшти дека од 2026 година повторно ќе настапува како музичар, со фокус на традиционалната македонска музика и инструменти. Музиката, како што наведе, за него претставува „лек за душата“, а неговата цел ќе биде промоција на македонскиот мелос, културата и јазикот.
Според судските одлуки, условниот отпуст формално започнува од 31 декември 2025 година.