Од денес започнуваат најубавите летни авантури – исполнети со знаење, нови искуства, пријателства и спомени кои ќе останат засекогаш! Ова на Фејсбук го напиша скопскиот градоначалник Орце Ѓорѓиевски.
-„Утрово, 115 ученици од средните училишта во Скопје заминаа за Охрид, каде ќе бидат дел од бесплатниот наставно-научен едукативен камп кој го организираме.
Сакавме на младите да им создадеме можност летото да го поминат поинаку, не само со одмор и дружење, туку и со учење, истражување, откривање нови интереси и развивање на сопствените потенцијали.
Во текот на престојот, учениците ќе учествуваат во научно-истражувачки работилници, едукативни предавања, интерактивни дискусии, тимски проекти, културни и креативни активности, спорт и рекреација.
Ќе учат да размислуваат критички, да истражуваат, да поставуваат прашања, да ги претвораат идеите во дела и да ја почувствуваат вистинската вредност на тимската работа.
Особено внимание ќе биде посветено и на развојот на лидерските, комуникациските и презентациските вештини, затоа што верувам дека секој млад човек треба да добие простор да го открие својот талент, да изгради самодоверба и храбро да зачекори кон својата иднина.
Покрај образовниот дел, учениците ќе имаат можност да го запознаат културното и историското богатство на Охрид, да се дружат, да разменуваат искуства и да создадат нови пријателства.
Од 25 до 31 август, во Охрид ќе престојува и втората смена од уште 115 ученици.
Нашата задача не е само да им кажуваме на младите дека тие се иднината, туку да инвестираме во нив, да им отвораме врати, да им даваме можности и да создадеме услови во кои ќе можат да станат најдобрата верзија од себе.
Затоа што секое ново знаење, секоја стекната вештина и секој охрабрен млад човек е инвестиција која му се враќа на целото општество.
Учи. Истражувај. Создавај.
И никогаш не престанувај да веруваш дека можеш повеќе!”, напиша тој.