Претседателот на Социјалдемократскиот сојуз на Македонија, Венко Филипче, на денешната прес-конференција изјави дека со власта на Христијан Мицкоски државата доживува драматичен економски пад, што се гледа и во колапсот на странските инвестиции.
„Откако премиерот заврши со сликање со нашите инвестиции со китење со туѓи перја сега дојде реалноста за неговата неспособност, имаме трипати помалку донесени странски инвестиции. Наместо стабилност, развој и економски раст, гледаме застој, пад и целосна незаинтересираност од страна на Владата “, рече Филипче.
Тој потсети дека токму странските инвестиции беа мотор на економскиот развој во периодот кога СДСМ беше на власт, но денес тој мотор е целосно запрен.
„Споредбено со годините на СДСМ кога во првите два квартали имаше 600 милиони евра странски инвестиции сега има само отколку 200 милиони евра. Значи на третина се сведени странските инвестиции во земјата“, потсети тој.
Претседателот Филипче исто така рече дека заминувањето на странските инвестиции е резултат не само на економска неспособност, туку и на арогантното однесување на Владата кон домашните и странските инвеститори. Според него економските показатели се алармантни на сите нивоа.
„Ако на ова се додадат сите останати економски други показатели, а тоа е дека ние сме со најмала минимална и просечна плата во регионот а платите немаат изгледи да растат, највисока инфлација во регионот 4,5%, најнизок проектиран економски раст од страна на светска банка од сите земји во кој патем е целосно изеден од инфлацијата тогаш е јасно дека оваа влада не носи во економски амбис,“ нагласи тој.