Честитајќи им на сите градоначалници кои до победа дојдоа во првиот круг, претседателот на СДСМ Венко Филипче објави дека неговата партија победила во три општини, Крива Паланка, Кривогаштани и Богданци. Рече дека резултатот не е лош, ако се земат предвид околностите.
Денот го оцени како мирен, но кажа и дека опозицијата имала свои забелешки кои веќе биле испратени до соодветните институции.
-Од преброените близу 70% од гласовите во уште девет општини, Центар, Пробиштип Чучер-Сандево, Чешиново, Валандово, Конче, Крушево, Лозово и Росоман. И таму изборен круг. И дополнително во уште неколку општини кадешто сме на второ место, Неготино, Македонска Каменица, Ранковце, Дојран, Демир-Капија, Зрновци и очекуваме податоци од уште неколку места, рече Филипче.
Апелираше граѓаните масовно да излезат во вториот круг за идните градоначалници да имаат легитимитет од што е можно повеќе граѓани.
-Овој резултат мислам дека не е тој којшто го посакувавме сите. Меѓутоа би рекол дека, имајќи ги околностите, не е лош резултат затоа што, не секаде, но во еден добар дел од општините навистина имаме зголемување на бројот на гласови кога ги споредуваме со ланската година и тоа е доказ на таа консолидација којашто започна изминатите месеци, изминатата година во партијата. Процес којшто зема време и процес на којшто ќе работиме во следниот период, рече Филипче.