Претседателот на СДСМ, д-р Венко Филипче, денеска присуствуваше на седмиот изборен Конгрес на НСДП. Во изјавата пред почетокот на Конгресот, Филипче нагласи дека партнерството со НСДП е потврда за заедничките вредности и политики кои двете партии ги споделуваат и ја истакна важноста на долгогодишната коалициска соработка меѓу СДСМ и НСДП.
„Им честитам за целата досегашна работа и благодарам за коалициската поддршка која што ја дава НСДП долги години наназад. Тоа е доказ дека навистина споделуваме еднакви исти вредносни политики“, рече Филипче.
Воедно, Филипче посочи дека соработката продолжува и во рамки на Фронт за слобода и правда, кој останува отворен за приклучување на нови политички субјекти и општествени чинители кои ја препознаваат потребата од промени.
„Коалицијата и соработката продолжува и понатаму, сега и во една нова форма во Фронтот за слобода и правда. Во Фронтот ги повикуваме и сите други политички партии, не само овие кои што веќе го потврдија учеството, а се дел од сегашната коалиција, туку и другите политички партии, дури дел на коалициските партнери на сегашната криминална власт, затоа што тие знаат дека оваа власт не ја води државата како што треба“, рече Филипче.