Фудбалската федерација на Македонија реагираше по натпреварот меѓу Тиквеш и Вардар, оценувајќи дека ВАР-интервенцијата по која домашниот тим остана со играч помалку била целосно оправдана, а упати и остра критика до телевизискиот коментатор на мечот.
Спорната ситуација се случила во 25. минута, кога фудбалерот на Тиквеш со број 22 го удрил противничкиот играч со лакт во пределот на главата, без можност да игра со топката.
Од ФФМ велат дека според Правилата на фудбалската игра, станува збор за прекршок кој ги исполнува условите за директен црвен картон, односно за сериозно недозволено однесување кое се граничи со насилничко однесување.
Според Федерацијата, интервенцијата на ВАР во оваа ситуација била правилна бидејќи одлуката директно влијаела врз дисциплинската санкција.
ФФМ реагираше и на коментарите за време на телевизискиот пренос, откако коментаторот повеќепати оценил дека немало прекршок за црвен картон.
„Доколку има потреба, со задоволство ќе му ги објасниме Правилата на фудбалската игра и судиските критериуми, за во иднина јавноста да добива стручна анализа, а не мислење засновано на непознавање на правилата“, порачаа од ФФМ.