Во голема меѓународна операција координирана од Европол, наречена „ДЕКОЈ III“ (DECOY III), полициските служби од 18 земји успеаја да спречат пуштање во промет на фалсификувани банкноти и монети со вкупна вредност од 1,2 милијарди евра.
Операцијата, која ја предводеа Австрија, Португалија и Шпанија, беше насочена кон криминални мрежи кои дистрибуираат лажни пари преку поштенски услуги. Оперативната фаза се одвиваше меѓу јуни и ноември 2025 година, а резултатите се објавуваат сега.
Податоците се загрижувачки – дури 90 отсто од запленетите пратки потекнуваат од Кина. Најголемиот поединечен удар го задале романските власти, кои пресретнале над 4,8 милиони евра во банкноти со изменет дизајн и откриле склад со над 223.000 фалсификати, исто така испратени од Кина.
Вкупно се запленети 7 милиони парчиња лажни пари, од кои најголем дел се евра (4,8 милиони) и американски долари (2,3 милиони), но и британски фунти и швајцарски франци.