Обилните снежни врнежи целосно ја парализираа Москва, каде што во текот на денот се очекува значително зголемување на снежната покривка. Според најавите на Рускиот хидрометеоролошки центар, снегот би можел да достигне висина од 15 до 20 сантиметри, што е блиску до рекордните вредности измерени во 1956 година.
Метеоролозите предупредуваат дека количината на врнежи во текот на денот најверојатно ќе го надмине рекордот од 1976 година, кога биле измерени 12,9 милиметри, а под сериозна закана е и јануарскиот максимум од 23 милиметри регистриран во 1970 година. Како главна причина за екстремните временски услови се посочува силен средоземски циклон кој донесе нестабилно и интензивно зимско време над руската престолнина.
Невремето веќе предизвика сериозни проблеми во воздушниот сообраќај. Од Росавијација соопштија дека на московските аеродроми се откажани 11 летови, додека уште 48 летови доцнат повеќе од два часа.
Надлежните служби апелираат граѓаните да бидат крајно внимателни, особено во сообраќајот, додека комуналните екипи се постојано на терен и работат на расчистување на улиците и одржување на клучната инфраструктура. Според најавите, снежните врнежи би можеле да продолжат и во наредните часови.