Висок руски воен офицер загина утринава во Санкт Петербург откако експлодираше неговиот автомобил, додека неговата сопруга е тешко повредена и пренесена во болница.
Инцидентот се случил на Ростовската улица, на паркинг во станбена зона, во моментот кога возачот го активирал моторот на џипот од кинеско производство од марката „Geely“.
Според локалниот медиум „Фонтанка“ и безбедносните канали на Телеграм, од силината на детонацијата мажот им подлегнал на повредите на лице место. Неговата сопруга, која исто така била во возилото, во критична состојба е хоспитализирана на одделот за интензивна нега.
Ударниот бран бил толку силен што ги разнел задните стакла, го откорнал поклопецот од моторот и задниот браник, додека делови од автомобилот биле расфрлани на десетици метри околу местото на настанот.
На терен веднаш биле испратени истражни екипи, форензичари и противпожарни единици.
Официјалните руски власти сè уште не го соопштуваат идентитетот на загинатиот офицер, ниту точната причина за експлозијата.