Демократската унија за интеграција реагира на договорот меѓу Министерството за образование и Општина Бутел во врска со уписот на албански ученици во ООУ „Петар Здравковски – Пенко“.
Од партијата велат дека според објавените информации, учениците од Чаир кои живеат во близина на училиштето ќе можат да се запишат во прво одделение доколку имаат брат или сестра кои веќе се ученици во училиштето. Во исто време, според ДУИ, со договорот не се предвидува отворање нова паралелка на албански јазик.
Од ДУИ сметаат дека ваквиот пристап го ограничува пристапот до образование на мајчин јазик и поставуваат прашање зошто уписот би зависел од тоа дали детето има член од семејството кој веќе учи во училиштето.
Партијата бара од Министерството за образование и Општина Бутел да ги објават податоците за бројот на деца кои побарале упис на албански јазик, како и критериумите според кои е донесена одлуката за упис.
Дополнително, ДУИ бара да се гарантира уписот на сите ученици кои ги исполнуваат законските услови и да се овозможи формирање паралелка на албански јазик доколку бројот на заинтересирани ученици е доволен.
Од партијата нагласуваат дека образованието е право, а не привилегија и оти институциите треба да обезбедат еднаков пристап до образование за сите деца.
ДУИ наведува дека доколку има 25 или повеќе ученици кои сакаат да следат настава на албански јазик, очекува да биде отворена соодветна паралелка.