По неколкудневни судири во Персискиот Залив, САД и Иран постигнале договор за прекин на непријателствата и продолжување на разговорите во рамките на претходно потпишаниот меморандум за разбирање, соопштил американски функционер за повеќе светски медиуми.
Според информациите, двете страни се согласиле да ги продолжат техничките разговори за сите точки од договорот, а во меѓувреме да се воздржат од понатамошни воени дејства.
„Тие се согласија да продолжат со техничките разговори во однос на сите делови од меморандумот за разбирање. Двете страни засега ќе се повлечат и бродовите ќе можат слободно да се движат“, изјавил американски функционер.
Американскиот портал „Аксиос“, повикувајќи се на висок претставник на администрацијата, објави дека нова рунда разговори меѓу претставници на Вашингтон и Техеран треба да се одржи утре во Доха, главниот град на Катар.
„Одлучивме да ги запреме сите кинетички активности“, изјавил неименуваниот американски функционер, термин што најчесто се користи за прекин на воени операции.