Претседателот на Движење ЗНАМ – За Наша Македонија, Максим Димитриевски, во гостувањето во емисијата „Тема на денот“ на Сител Телевизија порача дека ЗНАМ останува единствената политичка партија која континуирано е на терен, разговара со граѓаните и ги гради своите политики врз основа на нивните реални потреби, а не врз основа на нарачани анкети и медиумски конструкции.
Осврнувајќи се на последните анкети објавени во јавноста, претседателот на ЗНАМ, Максим Димитриевски, порача дека граѓаните одамна ја препознаваат разликата меѓу реалното мерење на јавното мислење и неговото креирање. Тој нагласи дека ЗНАМ не вложува огромни средства во политички маркетинг, туку својата енергија ја насочува кон директна комуникација со граѓаните.
Во рамки на караванот „Европска ЗНАМ, Европска Иднина, Европска Македонија“, партиското раководство досега оствари низа средби со граѓани во повеќе градови низ државата, а активностите ќе продолжат со засилено темпо од септември.
Од партијата посочуваат дека ЗНАМ во овој период е единствената политичка опција која наместо дејствување од партиски канцеларии, секојдневно е на терен, разговара директно со граѓаните и ги слуша нивните проблеми, идеи и очекувања.
„ЗНАМ е меѓу граѓаните и во текот на работното лето. Остваруваме средби со членството, но и со сите граѓани кои сакаат да разговараат со нас. Во моментов сме единствената партија која го практикува овој пристап и сака директно да ги слушне потребите на луѓето“, изјави Димитриевски.
Во однос на владината реконструкција, лидерот на ЗНАМ истакна дека партијата не претрпела загуба, туку направила стратешко политичко позиционирање во согласност со своите програмски цели.
Тој потсети дека во периодот додека го раководеше Министерството за правда, ЗНАМ реализираше активности кои, според него, претставуваат основа за понатамошни реформи. Биле подготвени повеќе од 35 законски решенија, од кои дел се веќе усвоени, а дел се во владина и собраниска процедура.
Преземањето на ресорот земјоделство, додаваат од ЗНАМ, е насочување кон една од клучните определби на партијата – создавање поодржлива економија преку поддршка на домашното производство, земјоделците и развојот на руралните средини.
Во врска со критиките од СДСМ дека ЗНАМ „не постои“, Димитриевски порача дека политичката реалност не се менува со изјави и партиски желби.
Според него, ЗНАМ за краток период изградил политичка структура, освоил парламентарен статус, формирал пратеничка група, има свои советници во повеќе општини и е дел од извршната власт.
„Тоа се факти кои не можат да се избришат. За разлика од оние кои се потпираат на политички пораки и спинови, ЗНАМ ја гради својата поддршка преку секојдневен контакт со граѓаните“, велат од партијата.
Од ЗНАМ порачаа дека партијата својата сила не ја гледа во маркетинг кампањи и платени истражувања, туку во директната комуникација со луѓето – на терен, во населените места и преку разговор со граѓаните.