Движењето ЗНАМ денеска во Скопје организираше настан посветен на отчетот на избраните и именуваните функционери од своите редови.
Претседателот на ЗНАМ, Максим Димитриевски, порача дека довербата кај граѓаните се гради преку работа и резултати, а се потврдува со отчетност и преземање одговорност.
Тој истакна дека секој функционер е избран со доверба од граѓаните и дека функцијата подлежи на нивна оценка.
„Секој еден функционер од ЗНАМ, почнувајќи од сите вас овде во салата, завршувајќи до мене – секој еден е менлив. Граѓаните даваат и граѓаните земаат власт“, рече Димитриевски.
Осврнувајќи се на критиките од СДСМ, тој порача дека ЗНАМ нема да дозволи, како што наведе, политичките пресметки да влијаат врз начинот на кој движењето ја гради довербата со граѓаните.
Димитриевски ги отфрли обвинувањата за наводни афери и нагласи дека, според него, ЗНАМ ги темели своето дејствување на чесност, отчетност, одговорност и транспарентност.
Отчетот на избраните и именуваните функционери на ЗНАМ ќе продолжи и во други градови низ земјава до крајот на годината, како дел од процесот на претставување на реализираните активности и резултатите од нивното работење во изминатите две години.