Во Државната изборна комисија (ДИК) денеска се разгледуваат вкупно 16 приговори доставени за постапките за гласање и сумирање на резултатите во три општини: Брвеница, Шуто Оризари и Карпош.
Членовите на ДИК едногласно го отфрлија приговорот доставен од кандидатот за градоначалник Хаќим Рамадани за пет избирачки места во Општина Брвеница.
Членот на ДИК, Ангелчо Ристов, образложи дека приговорот содржи правно неформални недостатоци, бидејќи е поднесен од кандидат за градоначалник, а законски треба да биде поднесен од подносителот на кандидатската листа. Поради тоа, ДИК го отфрли приговорот како недозволен.
За Општина Шуто Оризари поднесени се вкупно 13 приговори, од кои 10 се од коалицијата „Твоја Македонија“ предводена од ВМРО-ДПМНЕ, а три од Сојузот на Роми.
- ИМ 2956 (Одбиен): ДИК го отвори избирачкиот материјал за Избирачко место 2956 поради сомнежи за несовпаѓање на две гласачки ливчиња. По пребројувањето, констатирано е дека нема утврдено гласачко ливче повеќе, и дека тоа не е основа за поништување на гласањето. Оттука, ДИК го одби овој приговор. Сепак, констатирана е промена во бројот на гласовите за кандидатот со реден број 9 (два гласа помалку) и во бројот на неважечки ливчиња (вкупно 10, наместо осум).
- ИМ 2971 (Во тек): Во тек е броење на гласачките ливчиња и анализа на целиот изборен материјал за Избирачко место 2971, за кој приговор поднела коалицијата „Твоја Македонија“.
Разгледувањето на приговорите за Општина Карпош е исто така во тек на 156-тата седница на ДИК.