Државната изборна комисија (ДИК) соопшти дека денеска и официјално започнува постапката за собирање потписи за независни кандидати за градоначалници во четири општини: Гостивар, Врапчиште, Маврово и Ростуше и Центар Жупа.
Постапката за поддршка на независните кандидатури ќе трае до 30 ноември 2025 година, кога потписите ќе можат да се предаваат до 24:00 часот.
Потписите ќе се собираат пред службените лица на надлежните подрачни одделенија и канцеларии на ДИК, како и пред надлежен нотар. Собирањето ќе се одвива секој работен ден во редовното работно време, односно од 8:30 до 16:30 часот.
ДИК информира дека за собирање потписи за градоначалник на Гостивар, Маврово и Ростуше и Врапчиште е надлежно Подрачното одделение на ДИК – Гостивар. Канцеларијата на ДИК – Дебар е надлежна за општина Центар Жупа.
Повторените избори за градоначалници во овие четири општини се одржуваат бидејќи на Локалните избори на 19 октомври 2025 година не беше постигнат цензус, со што не беа избрани градоначалници.