Повеќе од половина од пријавените болни и немоќни лица, или 2.762 од вкупно 4.826, го искористиле своето право на глас до 16 часот, информира Државната изборна комисија (ДИК).
Овие граѓани гласаат денеска, ден пред одржувањето на вториот круг од локалните избори.
Според податоците на ДИК, во 14 казнено-поправни установи, каде право на глас имаат 1.256 лица, до 16 часот гласале 380 гласачи. Во установите за вонсемејна грижа, од 214 сместени лица, гласале 78.
Од Комисијата информираат дека гласањето, кое започнало утринава во 7 часот, се одвива без прекини и инциденти во сите општини и во Градот Скопје.
Претседателот на ДИК, Борис Кондарко, изјави дека нема никакви проблеми ниту со изборниот материјал, ниту со изборните органи. Досега не се пристигнати забелешки, приговори или поплаки.
Утре ќе се одржи вториот круг од локалните избори, кога 1.013.375 граѓани ќе гласаат за градоначалници во 32 општини и во Градот Скопје. Дополнително, ќе се гласа и на три избирачки места во Шуто Оризари за советници.