Психосоцијалните ризици на работното место, заштитата на здравјето на вработените и создавањето побезбедни услови за работа ќе бидат главни теми на денешниот настан во Скопје, организиран по повод Европската недела за безбедност и здравје при работа.
Средбата ќе се одржи во хотелот „Александар Палас“, во организација на Советот за безбедност и здравје при работа, со поддршка на Меѓународната организација на трудот (МОТ). Активноста е дел од проектот „Кон безбедна и здрава работна средина во Северна Македонија“, поддржан со средства од Европската Унија.
Преку дискусии и размена на искуства, учесниците ќе разгледуваат начини за подобрување на работната средина, јакнење на превентивните мерки и примена на успешни практики за заштита на вработените.
На настанот ќе присуствуваат претставници на државните институции, Делегацијата на Европската Унија, МОТ, Европската агенција за безбедност и здравје при работа, како и претставници на работодавачите, синдикатите, компаниите и стручната јавност.
Во воведниот дел се предвидени обраќања на претседателката на Советот за безбедност и здравје при работа, Јасмина Чалоска, како и на претставници на Министерството за економија и труд, Делегацијата на ЕУ, МОТ и Европската агенција за безбедност и здравје при работа.
Во рамки на програмата ќе бидат доделени националните награди за добра практика во областа на безбедноста и здравјето при работа за 2026 година. Наградените компании ќе ги презентираат своите искуства, по што ќе се одржи панел-дискусија за актуелните предизвици и можностите за подобрување на заштитата на работниците.
Целта на активностите е да се подигне свеста за значењето на безбедната работна средина, да се поттикне превенцијата и да се зајакне грижата за физичкото и менталното здравје на вработените.