Денешното рочиште за пожарот во дискотеката „Пулс“, каде животот го загубија 63 лица, донесе трогателни детали од сведочењето на Дејан Николов, сопственик на авто-лимарски сервис лоциран веднаш до објектот. Тој пред судот раскажа како со градинарско црево се обидувал да им помогне на заглавените девојчиња кои пискале на решетките од тоалетите.
„Ги скршивме прозорците однадвор, на решетките се фатија девојчиња, пискаа… Ги прскав со вода, а тие ми велеа: ‘чичко прскај повеќе, поубаво дишеме’“, сведочеше Николов со видлива вознемиреност.
Тој посочи дека дискотеката била „смртоносна стапица“ со заѕидани прозори и преполна со гости. Николов потврди дека претходно го прашал сопственикот Дејан Јованов зошто ја заклучува задната врата, на што добил одговор дека тоа се прави „за да не влегуваат луѓе без карта“. Кобната вечер, откако се повлекол со својот син дома, на излезот затекнал страшна сцена – три безживотни тела до оградата.