Цените на нафтата стабилни над 63 долари

Цените на нафтата се стабилизираа на меѓународните пазари над 63 долари во петокот, одразувајќи ја неизвесноста по новата епизода во трговската војна меѓу САД и Кина.

На лондонскиот пазар со барелот нафта попладнево се тргуваше по речиси иста цена како и при вчерашното затворање од 63,49 долари. Вчера го затвори тргувањето со загуба од 2,28 долари.

Позначителни ценовни промени денеска немаше ниту на американскиот пазар, каде со барелот се тргува по 60,22 долари. Вчера го затвори тргувањето на минус 2,15 долари.

Организацијата на земјите извознички на нафта (OPEC) засебно објави дека во четвртокот цената на барелот од референтната нафтена кошничка на нејзините членки пораснала за 3,01 долар, на 66,41 долар.

Пазарното расположение беше обележано со трговската војна меѓу САД и Кина и на крајот од седмицата. Во четвртокот, американскиот претседател Доналд Трамп ги зголеми царините за кинески увоз на 145 отсто, а Кина возврати со зголемување на царините на 125 отсто во петокот.

Новиот бран американско-кинески царини го засени американското одложување на увозните давачки за другите трговски партнери, при што аналитичарите предвидуваат дека трговскиот конфликт меѓу двете најголеми светски економии најверојатно ќе ја намали глобалната трговија и ќе го намали глобалниот економски раст и побарувачката за нафта.

„Пазарот е обликуван од царините и губењето на довербата во транспарентна и концизна политика“, заклучува Тамаш Варга од PVM.

Американското Министерство за енергетика во четвртокот ја намали прогнозата за глобален економски раст. Тие, исто така, предупредија дека царините може да влијаат на цената на нафтата, намалувајќи ги прогнозите за американската и глобалната побарувачка оваа и следната година.

Аналитичарите проценуваат дека кинеската економија ќе забави оваа година поради царините, според анкетата на Reuters. Кина е најголемиот увозник на нафта во светот.

Во меѓувреме, САД воведоа санкции за компанијата „Zhoushan Energy Group“, која управува со терминалот на островот Хуангзешан, бидејќи претоварува иранска нафта, се вели во соопштението на Министерството за надворешни работи.

Истовремено, Вашингтон и Техеран се подготвуваат да ги обноват преговорите за иранската нуклеарна програма. Иран ќе даде „реална шанса“ за нуклеарните разговори во Оман во сабота, соопшти иранското Министерство за надворешни работи.