Министерката за енергетика, рударство и минерални суровини, Сања Божиновска, порача дека целта на новата законска рамка не е само формално усогласување со европското законодавство, туку креирање функционален и современ закон што ќе гарантира правна сигурност и одговорни инвестиции.
Ова беше истакнато на презентацијата на резултатите од независната експертска ревизија на предлог-законите за геологија и за рударство, која потврди дека решенијата се всеопфатни и усогласени со најдобрите меѓународни практики.
„Рударството треба да биде двигател на економскиот развој, но придобивките од инвестициите мора да бидат пошироки – за државата, за економијата, за локалната самоуправа и, пред сè, за граѓаните. Затоа инсистираме на систем во кој ќе има и развој и заштита, и инвестиции и одговорност, и ефикасни процедури и високи стандарди“, нагласи Божиновска.
Ревизијата ја изработија проф. д-р Вјечеслав Боханек и меѓународната експертка Кристи Дизни Брукнер, во соработка со организацијата „Нов трет пат“ и надлежните институции. Според анализата која опфати компарации со законодавствата на шест земји от ЕУ, македонскиот модел воспоставува современа рамка со посебен фокус на критичните минерални суровини, заштитата на животната средина и управувањето со рударскиот отпад.