Врховниот суд на Бразил денеска едногласно одлучи да го продолжи полицискиот притвор на поранешниот претседател Жаир Болсонаро. Одлуката доаѓа по налогот што судијата Александар де Мораиш го издаде во саботата, наведувајќи ризик од бегство како клучна причина за неговото притворање. Според CNN Brazil, Мораиш нагласил дека Болсонаро „намерно и свесно“ ги прекршил правилата за користење на електронската алка на ногата.
Судијата истакнал дека поранешниот претседател признал дека манипулирал со уредот, што го опиша како „сериозен прекршок и отворено непочитување кон судството“.
Во своето гласање, судијата Флавио Дино дополнително го посочил прекршувањето поврзано со алката и организацијата на стража од страна на синот на Болсонаро. Тој навел дека бегствата на негови сојузници – Карла Замбели, Александар Рамадзем и Едуардо Болсонаро – укажуваат на „длабока неодговорност кон државните институции“.
Одбраната тврди дека манипулацијата со алката била последица на „ментална конфузија“, односно параноја и халуцинации предизвикани од несоодветна комбинација на лекови против икање. Болсонаро на сослушувањето изјавил дека мислел оти во алката има уред за прислушкување и дека само се обидел да го отвори капакот, а не да ја отстрани.
Адвокатите дополнуваат дека дури и во случај уредот да се расипе, Болсонаро не би можел да ја напушти резиденцијата, која се наоѓа во затворен комплекс под постојан надзор на федералната полиција.
Поранешниот претседател се наоѓа во посебна ќелија во зградата на Федералната полиција во Бразилија од саботата, откако наводно се обидел да ја оштети електронската алка со алатка за лемење.
Во септември, Болсонаро беше осуден на 27 години и три месеци затвор за обид за државен удар по поразот на претседателските избори во 2022 година.