Поранешниот кинески министер за правда, Танг Јижонг, е осуден на доживотен затвор поради корупција во големи размери. Судот во Сјамен го прогласи Танг за виновен за нелегално стекнување средства во вкупна вредност од над 137 милиони јуани (околу 19,7 милиони долари).
Според пресудата, тој ги злоупотребувал своите позиции и тргувал со влијание во долг период од 16 години, односно од 2006 до 2022 година. Како дел од казната, судот наложи целосна конфискација на неговиот имот. Истрагата против поранешниот функционер започна во април 2024 година под сомнение за „сериозни прекршувања на дисциплината и законот“, по што Танг беше експресно исклучен од Кинеската комунистичка партија.