Австралија од утре воведува привремена шестмесечна забрана за влез на државјани на Иран кои патуваат со туристички визи. Одлуката ја соопшти министерот за внатрешни работи, Тони Берк, кој изрази загриженост дека посетителите од оваа земја би можеле да останат во Австралија и по истекот на нивните дозволи.
„Ова е одлучна акција во интерес на нашата држава, особено во време на брзи глобални промени“, изјави министерот Берк, додавајќи дека во моментов околу 7.000 Иранци поседуваат важечки туристички визи.
Новата мерка предвидува одредени исклучоци. Забраната нема да важи за лица со долгорочни визи, како и за оние кои имаат блиски членови на семејството, деца или брачни партнери кои веќе живеат во Австралија.
Ваквиот потег на Канбера доаѓа по неодамнешниот скандал со иранската женска фудбалска репрезентација, кога седум фудбалерки побараа политички азил во земјата. Иако пет од нив подоцна ги повлекоа барањата, инцидентот беше повод за итна реакција на властите.
Сенаторот Дејвид Шобриџ упати остри критики кон владата, карактеризирајќи ја одлуката како „сурова и неправедна“. Според него, целта е единствено да се спречат нови случаи на барање азил по примерот на фудбалерките.