Армијата за 230 милиони евра ќе се опреми со осум хеликоптери од италијанскиот производител „Леонардо хеликоптерс“

Министерката за одбрана Славјанка Петровска денеска на брифинг со претставниците на медиумите ја образложи одлуката за набавка на осум нови повеќенаменски хеликоптери од типот AW149 и AW169M за Армијата на Република Северна Македонија од светски познатата и реномирана компанија „Леонардо“.

Министерката Петровска истакна дека препораката за набавка на овие хеликоптери е донесена од Интегрираниот проектен тим составен од експерти во Министерството за одбрана и Армијата, кој функционира од 2019 година. Во овој период ИПТ тимот реализираше бројни работни состаноци и посети на компаниите – кандидати за набавка на новата платформа хеликоптери, во чии рамки беа извршени и демонстративни летови со потенцијалните нови хеликоптери.

„Беше извршена сеопфатна и објективна анализа на сите алтернативи преку голем број на матрици и утврдена методологија кои вклучуваа тактичко-технички перформанси на хеликоптерите, опременост со системи за реализација на потребни мисии, системот за одржување, цени, обуки, перспективност и слично“ рече Петровска.

Министерката додаде дека паралелно со оваа набавка, а како дел од една целина Министерството за одбрана работи и на подобрување на состојбата со персоналот кој понатаму ќе ги лета и одржува овие хеликоптери.

„Со набавката на новите хеликоптери ќе дојде до значителна модернизација на воздухопловната компонента и подигање на способностите за извршување на мисии како за потребите на Армијата така и за поддршка и на другите цивилни институции на нашата држава. Инвестирањето во Армијата е инвестирање во иднината на нашата држава и затоа ќе продолжиме со овој интензитет“, истакна министерката Петровска.

Претставниците на медиумите од страна на заменикот-командант на Воздухопловниот ВИНГ, полковникот Игор Чкоров беа запознаени со карактеристиките на хеликоптерите од типот AW149 и AW169M, како и причините зошто овие хеликоптери се најсоодветни за македонската Армија.

Набавката ќе започне да се реализира по потпишувањето на договорот Влада-со-Влада, меѓу Република Северна Македонија и Република Италија кој ќе биде потпишан деновиве.

Во оваа набавка покрај набавката на 4 хеликоптери од типот AW149 и 4 хеликоптери од типот AW169M е вклучен и пакет за логистичка поддршка – опрема која ги исполнува оперативните барања за извршување на специфични мисии; комплет резервни делови и потрошен материјал, специјален алат, испитна опрема за двата хеликоптери; тренажер и изградба на модерен инфраструктурен објект и комплетна обука на летачкиот и техничкиот персонал. Хеликоптерите се очекува да пристигнат во периодот од втората половина на 2026 до крајот на 2028 година.