Најмалку три лица ги загубија животите во катастрофалните поплави предизвикани од обилните дождови што го погодија Истанбул, додека четири лица се водат за исчезнати, соопшти канцеларијата на гувернерот. Водното невреме предизвика излевање на водотеците, поплавување на стотици куќи, деловни објекти и патишта, како и целосен колапс во сообраќајот.
Според информациите од Си-ен-ен Турк, жртвите настрадале во различни делови од градот:
- Триесет и четиригодишен маж починал во болница откако несреќно паднал и ја удрирал главата на тротоарот додека се обидувал да ја премине улицата.
- 14-годишно момче загинало од електричен спој во водата во населбата Фатих.
- Третата жртва е пронајдена заплеткано во греда на мост во близина на паркот Садабат во населбата Кагитане, а процесот на идентификација е во тек.
Во текот на ноќта, спасувачките екипи со помош на тешка механизација и чамци евакуираа десетици граѓани, вклучително и работници кои останале заробени во поплавените згради. Меѓу најтешко погодените локации е населбата Кагитане, каде што реката со исто име се излеа и ја поплави историската џамија Садабат, нејзиниот двор и околните објекти.
Промена на бојата на Босфорот и историски врнежи
Обилните врнежи драстично ја промениле и бојата на морето по одредени делови од брегот на Босфорот, каде што огромните количини кал од копното ја обоиле водата во кафена боја. Оваа појава била особено видлива крај брегот на Еминону, а заматената вода се проширила сè до подрачјето пред познатата палата Топкапи.
Според Центарот за координација на вонредни состојби во Истанбул (АКОМ), само во населбата Бејкоз од полноќ во вторникот до 7:30 часот утрово биле измерени неверојатни 269,5 литри дожд на квадратен метар.
„Градот се соочи со еден од најсилните бранови дожд во последните години. На некои локации наврнале помеѓу 130 и 273,1 литри дожд на квадратен метар, а особено беа погодени подрачјето околу Босфорот и северните делови од европската страна на градот“, изјави вршителот на должноста градоначалник на Истанбул, Нури Аслан, за агенцијата Анадолија.
Невремето, кое започна во вторникот, се интензивираше вчеравечер, претворајќи ги улиците и подвозниците во вистински езера, заробувајќи возила и оставајќи бројни жители блокирани во нивните домови и работни места.