Апелациониот суд во Скопје денеска ќе одржи клучна јавна седница на која ќе се разгледуваат жалбите за еден од најпотресните кривични предмети во поновата историја – убиствата на 14-годишната Вања Ѓорчевска и 74-годишниот Панче Жежовски.
Пред второстепениот суд се наоѓаат жалбите на четворицата осудени на доживотен затвор: Љупчо Палевски, Велибор Манев, Боре Видевски и Влатко Кешишев. Тие беа прогласени за виновни за свирепо убиство и грабнување на двете жртви во ноември 2023 година.
Покрај одбраната, жалба поднесе и Основното јавно обвинителство. Обвинителството го оспорува делот од пресудата со која таткото на Вања, Александар Ѓорчевски, беше ослободен од обвинението поради недостиг на докази. Денешната седница треба да даде одговор дали доживотните казни ќе бидат потврдени или предметот ќе претрпи измени.