Претседателката Гордана Сиљановска – Давкова денеска на свечена церемонија ќе го одликува командантот на Националната гарда на Вермонт, генерал-мајор Грегори Најт, со Орден за воени заслуги.
Како што информираат од Кабинетот на претседателката, одликувањето се доделува за „неговиот особен придонес во продлабочувањето на македонско-американското пријателство и воената соработка“. Оваа соработка резултираше со бројни активности за зајакнување на капацитетите и за зголемување на борбената готовност на Армијата.
Генерал-мајор Најт е во официјална посета на државата која ќе трае до 11 декември.
По пречекот со високи воени почести, генералот Најт ќе оствари средби со началникот на Генералштабот на Армијата, генерал-мајор Сашко Лафчиски, и министерот за одбрана, Владо Мисајловски.
Предвидени се средби и со претседателката Сиљановска-Давкова (во својство на врховен командант на Вооружените сили) и со претседателот на Владата, Христијан Мицкоски.
Во рамки на посетата, американскиот командант ќе ја посети и Воената академија „Генерал Михаило Апостолски“ во Скопје, каде ќе се сретне со раководството на Академијата.