Министерството за здравство (МЗ) започна со темелна анализа на човечките ресурси во јавните и приватните здравствени установи низ државата. Ресорниот министер Азир Алиу денеска соопшти дека ова е почеток на воспоставување Регистар на работници во областа на здравството.
Овој регистар ќе овозможи следење на движењето на кадарот во системот – од пензионирања, нови вработувања и специјализации, до префрлување од една во друга установа.
„Тоа значи дека кога ќе се зборува за нови вработувања тоа ќе биде одговор на конкретни потреби да здравствениот систем… ќе знаеме точно колку лекари и сестри треба да има таму, кога ќе кажеме дека нема да дозволиме да има градови со двојно помалку лекари по жител, ќе знаеме како да го исправиме тоа“, истакна Алиу.
Според претставената анализа, во државата функционираат 3.779 здравствени установи, од кои 2.942 се во мрежата на здравствени установи. Притоа, од вкупниот број, 2.830 се приватни (ПЗУ), а само 112 се јавни установи (ЈЗУ).
Вкупниот број на вработени во јавниот и приватниот сектор изнесува 32.383 лица.
- Во ЈЗУ: 18.536 вработени, од кои 4.746 се лекари и медицински соработници на секундарно и терциерно ниво, а 7.003 се медицински сестри.
- Во ПЗУ: 13.847 вработени, од кои 9.040 се лекари и членови на тимот во примарно здравство.
Министерот посочи дека податоците се класифицирани по специјалност, профил и тип на установа, со цел да се креираат политики базирани на точни и навремено ажурирани податоци.
„Здравството не може да се реформира „на слепо“… ако не знаете точно колку луѓе работат во системот, каде работат, со каква стручност“, заклучи Алиу, појаснувајќи дека анализата е резултат на вкрстување на податоци од Централен регистар, коморите (Лекарска, Стоматолошка, Фармацевтска), Агенцијата за вработување и други институции.