Првообвинетиот во предметот „Лотарија“, Прпарим Бајрами, ќе излезе од притвор откако Кривичниот совет при Основниот кривичен суд Скопје прифати гаранција во недвижен имот вреден 1.140.781 евра.
Според соопштението од Судот, тој ќе биде ослободен од затворот „Скопје“ веднаш по впишувањето на хипотеката во Катастарот на недвижности. Одлуката стана правосилна денеска, откако надлежниот јавен обвинител и останатите странки во постапката се откажаа од правото на жалба.
Покрај прифатената гаранција, Судот му определи и дополнителни мерки за претпазливост со цел обезбедување на неговото присуство. На Бајрами му е одземен пасошот, му се забранува издавање нова патна исправа и му се одредува обврска редовно да се јавува во Судот.
Предлогот за замена на притворот со гаранција одбраната го поднела на 14 октомври, а Кривичниот совет при одлучувањето го зел предвид и законскиот рок за траење на мерката притвор.
Од Кривичниот суд објаснуваат дека притворот во конкретниот случај не може да трае подолго од 60 дена. Бајрами сам се јавил на издржување на мерката на 9 септември, со што максималниот рок истекува на 8 ноември.
Основното јавно обвинителство Скопје на 13 август поднесе обвинителен предлог против Бајрами за кривично дело „Злоупотреба на службената положба и овластување“, за кое е предвидена казна затвор до пет години.
Притворот претходно му беше одреден бидејќи не им беше достапен на органите на прогонот, а по неговото укинување, судската постапка ќе продолжи.