Со судско рочиште во Скопје продолжува предметот против деветтемина полициски службеници обвинети за случајот со кочанската дискотека „Пулс“, каде одбраната презентираше нови докази и сведоци.
Бранителите образложија околу 16 материјални докази и осум сведоци. Адвокатот Бранко Колев појасни зошто е предложен сопственикот на дискотеката, Дејан Јованов – Деко.
„Го предлагаме на околности затоа што застапникот на обвинението тврди дека обвинетите му дозволиле на Деко да стекне имотна корист која се изразува во плата која ја земал како вработен за шест месеци, па на таа околност бараме да биде сослушан, дали тоа му е овозможено од обвинетите“, изјави Колев.
Документацијата што ја приложи одбраната се однесува на работењето на МВР и СВР Штип, како и на безбедносните состојби во објектот за кои постапувало кочанското одделение.
Обвинителката Спасенка Андонова најави став за предлозите на следното рочиште, додека судијата одлучи судењето да продолжи утре напладне во 12 часот. Полициските службеници се со терет за злоупотреба на службената положба при издавањето согласности за работа на дискотеката, а на претходните рочишта тие негираа вина.