Вкупно 59 лица, меѓу кои и сопственикот, се уапсени во обемна акција на грчката полиција спроведена во познат синџир пекарници под сомнеж за големи даночни измами. Според првичните проценки на надлежните, штетата нанесена на грчкиот државен буџет достигнува до 100 милиони евра.
Полициската акција е во тек и досега опфати над 200 продажни објекти. Обвиненијата со кои се соочуваат приведените се однесуваат на организирана измама на штета на државата, даночно затајување, неплаќање ДДВ и неуплаќање на придонеси за социјално осигурување.
Истражните органи го проширија опсегот и врз други поврзани компании, за кои постојат сомневања дека сопственикот ги поседувал директно или зад сцената преку трети лица.
Сопственикот на познатиот синџир пекарници „Хориатико“ и претходно ѝ е познат на полицијата и има криминално досие. Во 2008 година тој беше уапсен за трговија со луѓе и илегално доведување жени од Источна Европа за работа во стриптиз клубови. За тие активности тој подоцна беше осуден на 10 години затвор, а нелегално стекнатите пари се переле токму преку пекарниците.
Ова е втор голем случај за финансиски криминал во Грција во изминативе неколку дена, откако претходно беше разбиена мрежа за даночно затајување и перење пари во познат синџир пицерии, каде што беа уапсени 23 лица.