Осудениот С.З., познат како Симе, наместо во затвор, се наоѓа на слобода и активно работи на терен за владејачката партија, тврдат од опозициската СДСМ.
Портпаролката и членка на Извршниот одбор на СДСМ, Богданка Кузеска, на денешната прес-конференција презентираше нови фотографии од вчерашните настани, на кои, како што наведуваат од партијата, лицето се гледа во близина на премиерот и лидер на ВМРО-ДПМНЕ, Христијан Мицкоски, за време на неговите изјави и обиколки во Брвеница.
„Симбол на криминалот и човек фатен со поголема количина дрога, оружје, муниција и пари повторно е на слобода. Цела јавност го гледаше на видеа како пука со калашников или како го цитира Воислав Шешељ пред руско знаме. Сега истиот тој човек е пуштен да работи и да се заканува на терен во Брвеница“, истакна Кузеска.
Од СДСМ потсетуваат дека лицето претходно било уапсено во период кога, според нив, во Србија биле запленети пет тони дрога по потекло од Македонија. Партијата упати директни прашања до надлежните институции и Обвинителството, барајќи итно расчистување на случајот: зошто осудениот не е во затвор, кој го ослободил и како е можно лице поврзано со дрога и оружје да биде ангажирано за партиски потреби наместо да ја издржува својата казна.