Бугарската претседателка Илијана Јотова најави дека ќе побара оставка од началникот на Националната служба за обезбедување (НСО), генерал-мајор Емил Тонев, по скандалозниот инцидент во кој припадник на службата ја собори на земја новинарката Соња Колтуклиева. Од своја страна, Тонев веќе изрази подготвеност да поднесе оставка од функцијата.
Јотова изјави дека е започната итна проверка во НСО и дека ги очекува првичните резултати и официјалниот извештај од началникот за целосно расветлување на околностите. Таа нагласи дека гледа сериозни пропусти во постапувањето и очекува одговорност, како во делот на обезбедувањето на претседателката на бугарскиот парламент Михаела Доцова, така и во третманот на новинарката Колтуклиева.
Началникот Тонев информираше дека во тек е службена проверка, при што дел од членовите на безбедносниот тим се отстранети од работа до завршување на постапката, а доколку се утврди вина, ќе следуваат строги дисциплински мерки. Во меѓувреме, по распитот во обвинителството, новинарката Колтуклиева потврди дека за инцидентот е отворена преткривична постапка.
Претседателката на Собранието, Михаела Доцова, изрази длабоко жалење за настанот, оценувајќи го како апсолутно недозволив и најави дека лично сака да се сретне со новинарката за да ѝ се извини.