Бугарија во недела излегува на претседателски избори на кои главни теми се безбедноста, војната во Украина и односите со Русија, додека изборната кампања се одвива во услови на зголемени тензии во регионот на Црното Море.
На гласачкото ливче се наоѓаат 27 кандидатски двојки. Меѓу најистакнатите се актуелната претседателка Илијана Јотова, која настапува со Кирил Валчев, поранешниот технички премиер Андреј Ѓуров со Георги Кандев, како и лидерот на националистичката партија „Преродба“, Костадин Костадинов, заедно со Петар Волгин.
Според анкетите, фаворит на изборите е актуелната шефка на државата Илијана Јотова, која ја презеде претседателската функција во јануари откако претходниот претседател поднесе оставка за да учествува на парламентарните избори, по кои стана премиер. Нејзината кандидатура има поддршка од неговата партија. Главен противкандидат ѝ е Андреј Ѓуров, кој ја ужива поддршката од реформистичката опозиција, додека партијата ГЕРБ на Бојко Борисов овој пат не предложи свој сопствен кандидат. Евентуален втор круг од изборите е закажан за 1 ноември.
Во рамките на кампањата, Јотова ги нагласува повиците за национално единство, борба против сиромаштијата и завршување на војната во Украина, претставувајќи се како кандидатка за мир. Иако не го доведува во прашање членството на Бугарија во Европската Унија и НАТО, таа отворено се противи на продолжувањето на воената помош за Киев и бара директни преговори меѓу Украина и Русија.