Поради зголемените притисоци од новите сопственици и загрозувањето на независното известување, дури десет истакнати новинари и водители поднесоа откази на телевизијата Н1.
Според неделникот „Време“, меѓу тие што си заминале се познатите имиња: Даница Вучениќ, Жаклина Таталовиќ, Ксенија Павков, Жана Булаиќ, Наташа Миљковиќ, Миа Бјелогрлиќ, Ана Новаковиќ, Сања Косовиќ, Адам Сантовац и Димитрие Ѓуриќ.
Овој медиумски земјотрес се случува во периодот кога и редакцијата на порталот Nova.rs се соочува со отпор кон раководството поради обидите за наметнување нов главен уредник, што новинарите го гледаат како директен удар врз слободното новинарство пред претстојните избори закажани за 25 октомври.
По повод овие случувања, преку социјалната мрежа X се огласи новинарот на Н1, Младен Саватовиќ:
– На моите колеги кои решија да заминат и да се откажат од Н1, им посакувам сѐ најдобро и среќа. Неверојатни 12 години се зад нас, во мојот случај осум. Направивме многу како редакција, за учебници, на што треба да бидеме горди. И веројатно ќе се видиме повторно во нов филм, како што би рекле некои луѓе, напиша Саватовиќ.