Македонската книжевност ќе биде претставена на Саемот на книгата во Франкфурт, еден од најзначајните светски настани во издавачката индустрија. Саемот ќе се одржува од 7 до 11 октомври, а на него ќе се соберат издавачи, автори, литературни агенти, преведувачи и професионалци од книжевниот и креативниот сектор од целиот свет.
Македонската асоцијација на издавачи (МАИ) и годинава продолжува со претставувањето на македонската книжевност во Франкфурт, со обновен национален штанд, поголем избор на книги и автори и појасно структурирана понуда наменета за меѓународниот издавачки пазар.
МАИ повторно ќе го користи концептот „Читај во 7/8“, кој беше воведен минатата година како идентитет на македонскиот настап на саемот. Ритамот 7/8, карактеристичен за македонската музичка традиција, во концептот е претставен како симбол на македонската книжевност и нејзиниот препознатлив израз.
Во фокусот годинава ќе бидат современата македонска книжевност и литературата за деца, со посебен акцент на можностите за поддршка на преводи и објавување македонски автори во странство. На саемот ќе биде претставен и актуелниот конкурс на Министерството за култура и туризам за финансиска поддршка на преводи на странски јазици.
Претседателот на МАИ, Бојан Саздов, вели дека присуството на саемот во Франкфурт го гледаат како долгорочен процес, а не како еднократна презентација.
„Во изминатиот период поставивме основа – препознатлив концепт, каталози со најдоброто од македонската книжевност и директни контакти со меѓународниот издавачки сектор. Годинава одиме чекор понатаму, со повеќе книги и автори, појасно структурирана понуда и конкретни можности за финансиска поддршка на преводите и странските изданија“, вели Саздов.
Македонската делегација ја сочинуваат претставници на издавачките куќи членки на МАИ, кои на саемот ќе ги претставуваат своите издавачки програми, како и авторите и делата застапени во каталозите. Целта е да се отворат нови можности за превод, продажба на авторски права и соработка со странски издавачи.
Саемот на книгата во Франкфурт е едно од најважните места за трговија со авторски права и книжевни содржини, професионални средби и воспоставување меѓународни партнерства. На 78. издание годинава, Чешка е земја-почесен гостин.
Од МАИ посочуваат дека иако саемот трае пет дена, промоцијата на македонската книжевност во странство продолжува во текот на целата година, преку градење контакти и долгорочни партнерства.
Националното претставување на македонската книжевност на Саемот на книгата во Франкфурт се реализира со поддршка на Министерството за култура и туризам.