Два трговски брода под турско знаме се судрија во Мраморното Море во близина на Истанбул, а властите трагаат по десет членови на екипажот на еден од бродовите.
Несреќата се случила во близина на областа Силиври. Во судирот учествувале бродовите „Алсу“, кој пловел кон пристаништето Алиага, и „Тугберк Имамоглу“, кој бил на пат кон Карадениз Ерегли.
На местото биле испратени бродови на крајбрежната стража и хеликоптери за пребарување и спасување. На „Алсу“ немало видлива штета, но властите не успеале да воспостават контакт со „Тугберк Имамоглу“ и неговите десет членови на екипажот.
Според Истанбулската трговска комора за поморска трговија, „Тугберк Имамоглу“ е товарен брод, додека „Алсу“ е танкер за хемикалии.
Операцијата за пребарување и спасување е во тек.