Македонската јавност е потресена по веста за 13-годишното дете во Скопје кое при тепачка со врсници било прободено со нож во пределот на срцето.
Детето било избодено за време на тепачка на улицата „Македонско-косовска бригада“ во скопски Чаир. Во инцидентот учествувале пет лица – четворица малолетници и едно полнолетно лице. Според информациите од истрагата, во пресметката биле употребени ножеви и безбол-палки.
Основното јавно обвинителство Скопје донесе наредба за спроведување истражна постапка против 19-годишно лице, за кое постои сомнение дека сторило кривично дело „Насилство“ од член 386 став 6 во врска со став 3 и став 1 од Кривичниот законик.
Осомничениот и неговиот малолетен брат, кој е под законската граница за кривична одговорност, преземале дејствија на насилство при кои со убоди од нож биле нанесени тешки телесни повреди на едно дете и едно полнолетно лице. Полесно било повредено уште едно дете.
Министерот за здравство Сашо Клековски вчера на прес-конференција информираше дека состојбата на 13-годишното момче е сериозна.
„Детето вчера беше оперирано. Сепак, имаше директен срцев удар и сега е на интензивна нега“, рече Клековски.
Министерот за внатрешни работи Панче Тошковски соопшти дека пет лица биле приведени во врска со нападот со нож во Чаир. Според него, сите учесници во инцидентот се обезбедени од полицијата, додека повреденото дете е во многу тешка здравствена состојба и се бори за живот.
Тошковски посочи дека според првичните информации, осомничениот за нападот е малолетник и дека и тој и тешко повреденото дете се родени во 2012 година.
Случајот, според Тошковски, претставува еден од најтешките предизвици поврзани со малолетничкото насилство и бара поширок институционален одговор.
Тој порача дека во справувањето со ваквите случаи треба да бидат вклучени родителите, центрите за социјална работа, МВР, министерствата за социјална политика, образование и здравство, како и здравствените институции.