Грција се очекува денеска да потпише договор со Израел за набавка на повеќеслоен систем за воздушна одбрана во вредност од околу 3 милијарди евра (3,5 милијарди долари), како дел од поширокиот план за модернизација на војската, потврдија за Ројтерс два безбедносни извори.
Советот за национална безбедност на Грција веќе даде првично одобрение за зделката, која опфаќа напредни ракетни системи со краток, среден и долг дострел.
„Грчките претставници ќе потпишат четири договори со директоратите на СИБАТ и МАФАТ на Израел подоцна во понеделник во Тел Авив, во вредност од околу 3 милијарди евра, кои опфаќаат три вида ракети и радарски системи“, изјави еден од претставниците за Ројтерс.
Покрај главниот одбранбен пакет, истиот извор потврди дека ќе биде потпишан и посебен договор за систем против беспилотни летала.
Оваа набавка е дел од амбициозниот план на Атина до 2036 година да потроши околу 28 милијарди евра за изградба на повеќеслоен систем наречен „Ахилов штит“, кој треба да обезбеди одбрана од балистички ракети, авиони и дронови. Планот опфаќа и набавка на до 40 борбени авиони Ф-35 од САД, како и нови фрегати од Франција и Италија.
Грција издвојува речиси 3,5 проценти од својот бруто домашен производ за одбрана – удел што е значително повисок од оној на повеќето членки на НАТО, главно поради долгогодишниот спор со соседна Турција. Во моментов нејзиниот воздушен простор го штитат американски системи „Патриот“, руски „С-300“ и повеќе системи со краток дострел.
Грција и Израел во последните години одржуваат силни дипломатски и економски односи. Двете земји управуваат со заеднички центар за обука на воздухопловните сили во Грција, спроведуваат годишни воени вежби и соработуваат на сајбер-безбедноста и анти-дрон системите.
Претходно, во април годинава, министерствата за одбрана на двете земји во Атина потпишаа договор вреден околу 758 милиони долари за набавка на израелски ракетни артилериски системи „ПУЛС“ за потребите на грчката армија.