Македонските превозници денеска ќе излезат на предупредувачки протест пред Делегацијата на Европската Унија во Скопје, барајќи итно решение за проблемот со ограничениот престој на професионалните возачи во Шенген-зоната.
Протестот, организиран од транспортната асоцијација „Макам-транс“, ќе се одржи од 12 до 14 часот. Пред седиштето на Делегацијата ќе бидат паркирани дваесетина товарни возила, а ќе присуствуваат сопственици на транспортни компании, професионални возачи и други вработени во транспортниот сектор.
Превозниците протестот го организираат во пресрет на утрешниот состанок на работната група во Брисел, од кој очекуваат конкретен чекор кон надминување на проблемот со правилото 90/180. Според ова правило, државјани на земји кои не се членки на ЕУ можат да престојуваат најмногу 90 дена во рамки на период од 180 дена.
Од „Макам-транс“ велат дека по седум месеци сè уште нема трајно решение, поради што сакаат да испратат јасна порака до европските институции.
„После седум месеци сè уште не е надминат проблемот со престојот, а бидејќи септември е почеток на работите, сакаме да испратиме јасна порака да се направи нешто. На 1 септември се очекува да има средба на претставници на сите земји од Шенген-зоната, на која бараме да биде на дневен ред и нашето прашање“, изјави за МИА Биљана Муратовска, генерален секретар на „Макам-транс“.
Истовремено, протестни активности ќе има и во Србија, Босна и Херцеговина и Црна Гора. Превозниците од овие земји се соочуваат со истиот проблем и бараат професионалните возачи да добијат соодветен статус кој ќе им овозможи непречено извршување на работните обврски во земјите од Шенген.
Од „Макам-транс“ посочуваат дека во изминатите месеци не е покажана доволна волја за решавање на прашањето, иако, како што велат, во новата визна стратегија професионалните возачи се препознаени како лица кои вршат специфична професионална дејност.
Од Министерството за транспорт, пак, велат дека Владата презема активности за да им помогне на македонските превозници, меѓу другото и преку склучување билатерални договори со земји од Шенген-зоната.
Вицепремиерот и министер за транспорт Александар Николоски неодамна посочи дека Македонија веќе има договори со Швајцарија, Хрватска и Романија, а во периодот што следува се планирани разговори со Австрија, Словенија и Германија.
Целта, според него, е преку билатерални договори да се обезбедат најфреквентните транспортни рути по кои се движат македонските превозници.
Николоски порача дека Владата има разбирање за проблемот со кој се соочува транспортниот сектор и дека продолжува да бара решенија во рамки на своите можности.
Превозниците, сепак, инсистираат на системско и долгорочно решение на европско ниво. Тие предупредуваат дека неизвесноста на границите влијае врз работењето на компаниите, а дел од возачите одбиваат да патуваат поради страв од проблеми при влез или престој во Шенген-зоната.
Според „Макам-транс“, околу 17.000 професионални возачи од Македонија се засегнати од проблемот, додека на ниво на Западен Балкан бројката достигнува околу 100.000 возачи.
Доколку на утрешниот состанок во Брисел не биде постигнато преодно решение, превозниците најавуваат нови активности. Како можна следна мерка е предложен протест на граничните премини на 14 септември, при што секоја земја би организирала блокади на сопствените гранични премини.
Превозниците од Македонија, Србија, Црна Гора и Босна и Херцеговина и претходно протестираа со блокирање на товарните терминали на граничните премини, барајќи да бидат изземени од новите правила и системи за контрола на влез и излез во ЕУ.
Од секторот предупредуваат дека продолжувањето на проблемот може да предизвика дополнителни економски последици за транспортните компании и за целокупниот товарен сообраќај во регионот.