Граѓаните на Исланд се изјаснија против обновување на пристапните преговори со Европската Унија, покажуваат резултатите од референдумот одржан во саботата.
По преброени околу 188.500 гласови, 52,5 проценти од гласачите се изјасниле против повторно отворање на преговорите, додека 47,5 проценти биле за. Пет од шест изборни окрузи веќе ги објавиле конечните резултати, а и во преостанатиот југозападен округ водела опцијата „не“.
Во текот на изборната ноќ првично воделе приврзаниците на европската интеграција, особено по пребројувањето на гласовите од Рејкјавик. Сепак, со пристигнувањето на резултатите од руралните делови на земјата, предноста преминала на страната на противниците на продолжувањето на преговорите.
Референдумот го иницираше владата на премиерката Криструн Фростадотир, а граѓаните одлучуваа само дали Исланд треба повторно да ги отвори пристапните преговори со ЕУ. Гласањето не беше директно изјаснување за членство, а и евентуален договор за пристапување дополнително ќе требаше да биде ставен на нов референдум.
Главни теми во кампањата беа економијата, безбедноста и контролата врз природните ресурси. Поддржувачите на членството тврдеа дека ЕУ би донела поголема економска и геополитичка стабилност, додека противниците предупредуваа на губење дел од националниот суверенитет.
Особено чувствително прашање беше рибарството. Исланд располага со богати риболовни води, а стравувањата дека членството во ЕУ би ја ограничило националната контрола врз квотите и пристапот до морските ресурси со години се една од главните пречки за европската интеграција.
Исланд првпат поднесе апликација за членство во Европската Унија во 2009 година, по финансиската криза. Преговорите беа ставени во мирување во 2013 година по смената на власта, но апликацијата никогаш формално не беше повлечена.