Повеќе од 50 професионални возачи од Србија биле вратени од границите на Шенген-зоната само во последната недела поради правилото според кое државјани од земји надвор од ЕУ можат да престојуваат најмногу 90 дена во период од 180 дена. Податокот го соопшти српското здружение „Меѓународен транспорт“.
Од здружението предупредуваат дека дел од возачите од Западен Балкан, покрај враќање од граница, се соочуваат и со задржувања, депортации и забрани за повторен влез доколку го надминат дозволениот престој.
Проблемот ги засега и македонските професионални возачи, бидејќи правилото 90/180 важи и за нив. Фактот што во Шенген престојуваат поради работа и меѓународен транспорт засега не ги ослободува од ограничувањето што важи за државјани од трети земји.
Транспортните компании оценуваат дека ваквиот режим е тешко применлив во нивната професија, бидејќи возачите редовно влегуваат и излегуваат од земјите на Европската Унија и голем дел од работното време го поминуваат токму на европските патишта.
Иако проблемот со професионалните возачи од земји што не се членки на ЕУ е веќе препознаен и во европските документи, конкретен исклучок од правилото 90/180 сè уште не е воведен.
Поради тоа превозниците од Србија, Македонија, Босна и Херцеговина и Црна Гора најавија заеднички протести. На 31 август се планирани мирни собири пред делегациите на Европската Унија во четирите земји, а доколку не биде постигнато решение, од 14 септември се најавуваат и протести и блокади на граничните премини кон ЕУ.
Превозниците бараат професионалните возачи да бидат третирани како посебна категорија и времето што го поминуваат во Шенген при извршување транспорт да не се пресметува на ист начин како туристички или приватен престој.
Проблемот е особено чувствителен за транспортните компании од Западен Балкан, бидејќи голем дел од нивниот меѓународен превоз се одвива кон или низ земјите од Европската Унија, па ограничувањето директно може да влијае врз организацијата на транспортот, расположливоста на возачи и трошоците на компаниите.