Тешка несреќа се случила на плажа во Ханија на Крит, каде 45-годишен маж се здобил со сериозна повреда на вратот додека си играл со својата мала внука.
Според грчките медиуми, мажот го ставил девојчето на рамениците за да ѝ помогне да скокне во морето, но таа во еден момент ја загубила рамнотежата и паднала директно врз неговиот врат. Од ударот тој паднал во водата и се здобил со скршеница на вратен пршлен и повреда на ’рбетниот мозок.
Повредениот најпрво бил пренесен во болница во Ханија, а поради сериозноста на состојбата потоа бил префрлен во болницата „Венизелио“ во Ираклион.
Лекарите процениле дека е неопходна итна операција, а од Атина бил донесен специјален имплант за интервенцијата. По операцијата првично биле забележани охрабрувачки знаци, бидејќи мажот можел да ги движи рацете, но подоцна неговата подвижност повторно се намалила.
Медицинскиот тим внимателно ја следи неговата состојба и останува умерено оптимистичен дека може да дојде до подобрување. Следниот период ќе биде клучен за проценка на степенот на оштетувањето на ’рбетниот мозок и можностите за закрепнување.