Во лекувањето на одделни пациенти учествувале од три до осум медицински лица и не може да се бара индивидуална одговорност само кај обвинетите, изјави техничкиот советник на одбраната, доктор Владимир Даниловски, на денешното судење за случајот „Онкологија“.
Пред Основниот кривичен суд во Скопје, каде им се суди на поранешниот директор Нино Васев и уште двајца онколози за несовесно лекување, Даниловски посочи дека вештото лице на Обвинителството, доктор Маја Радник од Словенија, не располагала со целокупната медицинска документација.
Според него, од 165 достапни документи за терапија на еден пациент, на вештото лице ѝ биле доставени 60, додека кај друг пациент недостасувале документи за 11 години лекување.
Даниловски во своето излагање истакна дека не е докажана директна причинско-последична врска меѓу постапувањето на д-р Васев и исходот кај пациентите.
„Повеќегодишната терапевтска контрола на болеста и повеќекратно подолгото преживување на пацинетот не одат во прилог на тврдењето дека дадената терапија била штетна и придонела кон конкретна токсична реакција, оштетување органи и скратување на животниот век…“, изјави Даниловски.
Адвокатот на Васев, Боби Спирковски, изјави дека од вкупно 31 пациент што му се ставаат на товар на Васев, тој учествувал во лекувањето на шестмина, додека во терапијата учествувале уште 28 други лекари од Клиниката.
Спирковски најави дека како сведок ќе биде повикана доктор Мери Пешевска, која претходно призна вина и беше осудена на условна казна затвор од две години.
Обвинението ги товари лекарите Нино Васев, Симонида Црвенкова и Драган Јакимовски за тешки дела против здравјето на луѓето и несовесно лекување кај вкупно 47 пациенти.