Нови детали се објавени за убиството на 45-годишната Лулјета Обзова во атинската населба Неа Смирни. Според грчките медиуми, жената била застрелана од 48-годишниот Алтин Алмуча, кој веднаш потоа се самоубил. Полицијата ја истражува нивната врска и околностите што му претходеле на злосторството.
Снимките од безбедносните камери покажуваат дека мажот ја чекал пред зградата во која живеела. Кога излегла, ѝ пришол и пукал во неа, по што се застрелал. Истражителите проверуваат дали нападот бил однапред испланиран.
Според сведочењето на сестрата на жртвата, Обзова била во врска со мажот, но решила да ја прекине поради неговата љубомора и се плашела од него. Нејзината мајка, пак, изјавила дека не знаела за врската. Осомничениот бил оженет и имал дете, а неговата сопруга на полицијата ѝ кажала дека во последните 18 месеци забележала големи промени во неговото однесување.
Грчката полиција ги анализира мобилните телефони, пораките и последните разговори на двајцата за да утврди што точно се случувало пред убиството. Како можен контекст на фемицидот засега се разгледуваат љубомората и прекинувањето на врската, но официјалниот мотив сè уште не е утврден.