Владата на денешната седница донесе одлука со која се задолжуваат трговците да ги намалат цените на училишниот прибор од денеска, па сè до 30 септември 2026 година, соопшти владината портпаролка Марија Митева.
Според одлуката, трговците на големо имаат обврска да ги намалат цените за најмалку 10 проценти, додека во трговијата на мало намалувањето мора да биде најмалку 15 проценти.
„Со почетокот на новата учебна година, една од нашите цели е да им помогнеме на семејствата да ги намалат трошоците и да го заштитиме животниот стандард на граѓаните. Токму затоа, Владата на денешната владина седница донесе одлука со која се намалуваат цените на училишниот прибор, во периодот од објавување на одлуката во ‘Службен весник’, односно од денеска, заклучно со 30 септември 2026 година“, истакна Митева.
Мерката опфаќа ранци и ташни, тетратки, блокови, колажи, моливи и пенкала, боици, пластелин, теста за моделирање, подлоги, фломастери, текст-маркери, темперни, акрилни и водени бои и четки, линијари, дидактички материјали, острилки, гуми за бришење, детски ножици, футроли, лепила, шестари, дигитрони, украсна хартија, папки, картонски ташни и материјали за изработка.
Од Владата нагласуваат дека трговците ќе мора да обезбедат целосна транспарентност при истакнувањето на цените на производите.
„Особено важно е што со одлуката се обезбедува и транспарентност во однос на намалувањето. Трговците се должни покрај новата, намалена цена на производот, да ја прикажат и старата цена која важела на 1 јуни 2026 година. Затоа што, токму оваа цена се зема како базична врз основа на која се утврдува намалувањето“, објасни таа.
Одлуката стапува на сила со објавувањето во „Службен весник“ и ќе важи во текот на целиот следниот месец.
„Ова е конкретна мерка насочена кон директна поддршка на семејствата во период кога имаат зголемени трошоци за подготовка на децата за новата учебна година. Намалувањето на цените на училишниот прибор е уште еден чекор во насока на заштита на животниот стандард на граѓаните, како и намалување на притисокот врз семејниот буџет. Нашата цел е јасна, родителите да можат да го обезбедат потребниот училишен прибор за своите деца по пониски цени, со јасно прикажана базична, но и намалена цена и со правила кои важат подеднакво за сите трговци“, заклучи Митева.