Пожарникарите го изгаснаа пожарот што избувна синоќа во источниот дел на турскиот главен град Анкара, соопшти денеска државната новинска агенција „Анадолија“.
Пожарот во шумското подрачје во округот Мамак бил ставен под контрола по осумчасовна операција. Во врска со инцидентот е приведено едно лице осомничено дека го предизвикало пожарот.
Снимките објавени на социјалните мрежи покажуваат големи пламени јазици кои го зафатиле шумското подрачје на периферијата на градот.
Канцеларијата на гувернерот на Анкара на платформата Икс соопшти дека во погоденото подрачје биле преземени сите неопходни превентивни мерки. Во меѓувреме, надлежните започнале истрага за причините за избувнувањето на пожарот.
Турција во текот на летните месеци често се соочува со шумски пожари, а високите температури и сувите услови придонесуваат за нивно брзо ширење.