Најмалку 30 лица загинаа ноќеска во главниот град на Гвинеја, Конакри, откако голема количина отпад се одрони од депонија и затрупа повеќе објекти.
Несреќата се случила околу 2 часот по полноќ во општината Гбесија, а причина за одронот се обилните врнежи од дожд што го зафатија регионот.
Свлечиштето од смет затрупало шатори, импровизирани куќи, а според сведоштва на очевидци, под калта и отпадот завршила и една станбена зграда.
Во несреќата шест лица се тешко повредени, додека 16 се здобиле со полесни повреди. Спасувачките тимови со багери и тешка механизација непрекинато работат на расчистување на теренот.
Трагедијата се случува само една недела откако Владата во Конакри најави затворање на депонијата и дислокација на отпадот поради опасноста од свлечишта во дождовната сезона.
Иако Гвинеја располага со најголемите светски резерви на боксит и големи наоѓалишта на железна руда, земјата се соочува со сиромаштија и застарена инфраструктура.